مراجعة واستعراض فيلم Batman v Superman: Dawn of Justice

مراجعة واستعراض فيلم Batman v Superman: Dawn of Justice

مراجعة فيلم Batman v Superman باللغة العربية . الفيلم هو صاحب الترتيب الثاني في عالم DC Comics السينمائي. الفيلم من بطولة هنري كافيل وبين آفليك وجال جادوت وإيمي آدامز. السيناريو لكريس تيريو وديفيد اس جوير ومن إخراج زاك سنايدر
بعد تشويق دام لمدة 3 سنوات ، بترجع لينا DC Comics بالـ Sequel أو الجزء المُكمل لـ Man of Steel فيلم Batman v Superman: Dawn of Justice ..


Batman v Superman: Dawn of Justice مراجعة بالعربي | فيلم جامد

[ame]https://www.youtube.com/watch?v=0c7u7ZoKwBM[/ame]

بيبدأ الفيلم باسترجاع للمعركه الي حصلت بين الجنرال زود وسوبرمان من
منظور بروس واين وايه الي حصل معاه ساعتها ، سواء من تدمير لشركته
وموت الاف من موظفينه جواها ، اصابة موظفينه الناجين باصابات حرجه
انقاذه لطفله وبيكتشف ان والدتها ماتت جوه المبني ، ومن اللحظه ديه
شاف القوه التدميريه الحقيقيه لسوبرمان وبيقرر يجيبه الأرض.

أداء بن أفليك كـباتمان تاريخي بحق ، حبيته أكتر من كريستيان بيل بمراحل
بيقدم باتمان كما قال الكتاب ، والممثل جيرمي ايرونس معقول لحداً ما ككلاسيك ألفريد بتعليقاته الساخره وتقديم الدعم اللوجستي لباتمان من الكهف ، رغم ذلك محسيتش بشخصية بروس واين أوي ، مشوفتش البلاي بوي ، رجل الأعمال ، حتي في لحظه بروس هيتحط في موقف سخيف نوعاً ما هيخرج منه بمهاراته الاجتماعيه بأسلوب ضعيف جداً كل التركيز في الفيلم كان علي جانب واحد بس من الشخصيه وهو باتمان.

هنري كافل بينجح في انه يعطي صبغه انسانيه من التشكك والخوف علي سوبرمان بل وبينجح انه يخليك تتعاطف معاه كسوبرمان وتفهم الظروف الي بيمر بيها ويمكن لو كنت باتمان تيم علي ما توصل لجزء المعركه ما بينهم هتكون متعاطف بشده مع سوبرمان ، مع ذلك ظهور سوبرمان في الفيلم كان قليل نوعاً ما لدرجه تخليك تحس هو ده الجزء المكمل لمان اوف ستيل ولا ده فيلم باتمان وسوبرمان جاي ضيف عليه ؟

علي الرغم من ان شخصية لوثر كانت أكثر شخصية مثيره للاهتمام في الفيلم ، الا ان متمش القاء الضوء علي ماضيه ودوافعه كويس ، ليه كره سوبرمان ؟ ، ليه خطط لقتال البطلين ؟ ، ايه الهدف من ده كله ؟ ، كل ديه أسئله ممكن تفكر بيها مع نفسك وتحاول تستنجها الا ان الفيلم لم يلقي الضوء عليها تماماً !

دومسداي ، دومسداي بيظهر بقوة الوحش المدمر الخاص بـ 1992 وبيقدم معركه عظيمه سواء ككومبات أو كجرافيك لكن معركته قصيره زمنياً وبيهُزم
بسهوله نوعاً ما زائد انه زي ليكس لوثر بالظبط مفيش دوافع ليه هو مجرد غاضب وبيهاجم وخلاص !

وندر-ومان ، في البدايه لما شوفت الممثله جال جادوت كنت حاسس بخيبة أمل لانها مكانتش وندرومان الي بحبها والي في دماغي أبداً ، الا ان اندافعها بالسيف والدرع في الفيلم بيظهر روح المحاربه الأمازونيه الي فان دي سي بيعشقوها وبتثبتلي اني غلط بكل الطُرق الممكنه.

ظهور الشخصيات ، في الحقيقه ده أكثر موضوع فصلني في الفيلم
ظهورهم كان مُجرد لحظات قصيره في فيديو وملهمش أي تأثير في الفيلم
ولسه هيبدأوا يتجمعوا في الفيلم السنه القادمه ، عن طريق وندرومان وباتمان.

الساوندتراك : المزيكا حماسيه فعلاً ومظبوطه علي كل مشهد بالمللي

الجرافيك : جرافيك الفيلم أقل ما يوصف بيه مذهل ومن الحاجات الي بتغطي علي عيوب الفيلم بصوره كبيره لو ركزت فيها ومهتمتش ، سواء كمعارك أو كمطاردات أو حتي البيئه المحيطه ، جرافيك عظيم ومتعوب فيه فعلاً.

الخلاصه
: فيه ابداع حقيقي في اختيار الشخصيات من أول ممثل لاخر ممثل وكلهم لايقين علي الدور أخص بن أفليك وجيسي أيزنبيرج ، الا ان تركيز القصه علي جوانب احاديه من الشخصيات منعتهم من الابداع بالكامل ، والثغرات الي ماليه القصه من ناحية الدوافع والباك-ستوري ده غير الاسئله الي لم يتم الاجابه عنها زي مثلاً مين روبن الي مات ؟ ومات امتي وازاي ؟ ، والي لم يتم القاء الضوء عليها حتي! ، بتقلل من التجربه ككُل ، لكن المعارك رغم قصرها مع الموسيقي الخلفيه العظيمه والجرافيك المذهل بتنجح في تغطية العيوب بصوره معقوله.

التقييم الأخير : 8/10 - جيد جداً
وبالنسبه لاجابه سؤالي ، هسيبكم تشوفوا الفيلم وتقرروا

المصدر: منتديات مخابئ 2023 - من قسم: تقارير أفلام - مراجعة فيلم - كلاسيكيات